Kulan looga hadlayo sidii wax looga qaban lahaa cabashada Kalluumeysatada ayaa maanta ka dhacay Degmada Xamar Weyne, kaasoo ay soo qabanqaabiyeen beesha Carab Soomaali waxaa ka soo qeyb galay madax ka tirsan Dowladda Federaalka, maamulka Kalluumeysatada iyo Doonleyda magaalada Muqdisho, Waxgarad, siyaasiyiin iyo aqoonyahano, kaasoo looga hadlayo cabashooyinka Kalluumeysatada iyo sidii looga yareyn lahaa lacagaha canshuurta ah, iyadoo mas'uuliyiinta Dowladda Federaalka ee ka soo qeyb galay shirkaasi ay sheegeen inay door lixaad leh ka qaadanayaan sidii maamulka G/Banaadir canshuur dhimis ugu sameyn lahaa Kalluumeysatada.

Wasiirada Qoyska iyo Haweenka Drs. Fahmo Axmed Nuur oo ka mid ahayd madaxdii Dowladda Federaalka ee ka qeyb gashay kulankaasi ayaa sheegtay inay iyadu ka qeyb qaadan doonto sidii ay dowladdu wax uga qaban lahayd cabashooyinka Kalluumeysatada, iyadoo tixgelin siineysa codsiga ay u soo jeediyeen kalluumeysatada ee ku wajahan sidii Dowladda Hoose canshuurta uga dhimi lahayd.

Dhinaca kale waxaa halkaasi khudbado ka jeediyay xubno ka tirsan maamulka Doonleyda iyo Kalluumeysatada, kuwaasoo ka hadlay xaaladda ay ku sugan yihiin, iyo dhibaatooyinka ka soo wajaha howlahooda, iyagoo sheegay in howshooda ay hadba heer isu bedesho xilliga Badda awgeed marna ay hoos u dhacdo shaqada marna ay normal tahay, iyagoo sheegay in kalluunka iyo waxyaabaha kale ee ay badda ka soo saaraan loo iib geeyo magaalada Muqdisho iyo gobolada dalka qaarkood

jabra:-weriyaha
Ku Laabo